موقف لن يتكرر معى

استغفر الله العظيم من كل ذنب عظيم
اللهم اهدنى .. وعلمنى ..وعف لسانى
اللهم وفق قاريء هذه الرسالة، و أعنه على ذكرك و شكرك و حسن عبادتك، اللهم وفقه لما تحب و ترضى، اللهم أحسن خاتمته، و أجعل قبره روضة من رياض الجنات، اللهم ارحمه و ارضى عنه، و ارزقه الجنة التي وعدت عبادك الصالحين، اللهم انصر الإسلام و المسلمين، و أذل الشرك و المشركين، و دمر أعداء الدين و أجعل تدبيرهم تدميرهم يا ذا الجلال و الإكرام

يا عزيزى كلنا لصوص

ورقصنى ياجدع


بعد موجه بيع و خصخصه المصالح والمصانع الحكوميه بالعام الماضى سعيا لما قالو عنه ( احنا بنواكب العصر .. عصر الراسماليه) يبدو ان الاثر جاء سريعا وخوت جيوب بعض الحراميه من فلوس الشعب الغلبان فقالو نعمل ايه ياولاد .. نجيب فلوس منين .. خلاص معتش فيه مصانع ولاموارد دخل.. البلد مصادرها قلت .. طب والعمل هنجيب فلوس منين علشان حساب بنوك سويسرا يزيد والحراميه الصغيرين يلاقو اكل قامو فكرو انهم يستغلو الفلوس الزياده اللى فى جيوب الشعب الغلبان ويلمو ضرايب قال ايه.. الحلاق يدفع ضرايب ويعمل فاتوره والدكتور كمان يعمل فاتوره والسواق اهو كده كده مش ملاحق على الحراميه اللى على الطريق واى عامل او صنايعى المفروض يعمل فاتوره .. طب والنبى الناس دى تدفع ضرايب ليه.. اكن انا اما اروح لحلاق اقوله هات فاتوره .. ده اسمه كلام ناس عاقلين ناقص اقوله لملى الشعر بتاعى فى كيس .. دول ناس عايشين حياتهم يوم بيوم اللى بيكسبه فى اليوم بياكل بيه يعنى لو تعب يوم ولا نام فى السرير اسبوع هيطلع يشحت ياما هيموت من الجوع ..ساعتها البلد هتديله فلوس ياكل منها .. هما مفكروش فى الحكايه دى طبعا الحكومه الموجوده حاليا لا تختلف عن اللى قبلها كلهم كانو زى بعض بس هو الفرق فى حاجه ضغيره .. الحكومات اللى فاتت كانت بتعمل خطط طويله المدى للنصب على الناس اما الحاليه فهى معندهاش صبر وعملت خطط فوريه لمص دماء الغلابه قالو لنا ده نظام راسمالى ولازم البلد تدخل فيه ونواكب العالم ونرفع الضغط عن الحكومه وندى للفرد فرصه اكبر فى التنميه.. طب هو الفرد لاقى ياكل اصلا هو فى مرتبات فى مصر .. هو فى مصانع فى مصر .. دحنا بنشحت العيش من امريكا يا اغبيه..هى الراسماليه دى معناها انك تخلى واحد زى عز ينفرد بواحده من اهم السلع الاستراتيجيه لاى بلد وادينا شوفنا النتيجه .. وشوفنا عز عمل ايه .. المفروض اى دوله لما بتدخل هذا النظام بتدخل فيه واحده واحده وخصوصا لو كانت دوله فقيره زينا مش قفش .. طبعا كلنا عارفين ان مسيره الخصخصه لسه مستمره لسه التامين الصحى والتعليم وغيره عن قريب بس طبعا هى مش اسمها خصخصه بالمعنى المفهوم اسمها اقطاع .. ايوه للحبابيب يعنى والمحاسيب.. طبعا هى بلدنا دى عزبه ابوهم واحنا مالنا احنا طب لما انتو هتخصخصو كل حاجه يعنى مش هنتعالج ببلاش ولا هنتعلم ببلاش بتطلبو مننا ضرايب ليه .. اسف احنا فعلا بنشرب ميه معفنه ببلاش وبنشم هو بردو ببلاش تخيلو
طيب خلينا نقول الحكومه بتعمل كده علشان تبنى البلد .. البلد كل يوم فعلا بتعلى وبتتقدم بينا.. مصر بتتقدم بينا يولاد والحق القطر..
ومش هتكلم عن كميه المصايب والنصب عينى عينك اللى حصل فى سنه 2008 بس .. انا اصلا مش هعرف اعدهم. والحق القطر.

وردا على موجه النصب من الحكومه قرر الشعب ايضا انه ينصب هو كمان وكله بينصب على كله.. انبارح لاقيت شحات داخل الجامع عنده بتاع 30 سنه كده وشباب وزى الفل وحطط برفان تخيلو الشعب حاطط برفان ومعاه كيس فى علب دوى فاضيه (لزوم الشغل) وماشى بقمه التناكه وبيقول بربى فى كوم لحم والله انا اول مشوفته فى الجامع مقدرتش امسك نفسى من الضحك .. ايه الهبل ده .. هى بقت كده؟؟ طبعا انتو مش متخيلين شكله ..والله لو خبطى كف ليلزقنى على الحيطه ده هو اصلا انضف منى ولكن انا احييه هو هيعمل ايه مهى ده الشغلانه الوحيده اللى الدوله بتتدعمها ومبتخدش منها ضرايب وانتظرو قريبا طرق جديده فى الشحاته بعد ظهور مكبرات الصوت والموبيل والدش .. اه مهو فيه قنوات بتاع ناس شحاتين ولا مش شايفين مسابقات الشحاته.. جاوب على السوال واكسب 100 جنيه .. محمد اللى قاعد جانبى ده اسمه ايه؟؟ .. وكله بينصب على كله ومحدش بيقول لأ ولا حد فاضى يفكر ولا حد بيتحرك الحكومه تنصب واحنا ننصب والبلد كلها بقت مستنقع نصب .. الخواجات بينزلو مصر مبيرجعوش تانى . طبعا عارفين ليه
ختامى بحكم عظيمه
ابدنى تجدنى
الرجل المناسب فى المكان الغير المناسب
مصر هى امى والشعب بياكل زبادى

اللى يجاوب ..يكسب شنطه شحاته بكل مستلزماتها بما فيها كيس الدوى
كم عدد النصابين فى مصر؟
كم عدد المصايب فى عام 2008؟
اذكر اسم نقيب الشحاتين فى مصر؟؟ حد عارفه
علل.. اصابه اكتر من نص الشعب بتورم فى اعلى القفه خلال العام الماضى

ازمه جرادل فى البلد تخلى مجلس زى مجلس الشعب يولع .. والناس تتكلم

بسم الله
فوجئنا جميعا بالامس بحريق كبير فى مجلس الشعب والشورى المصرى .. لم اكن اصدق ذلك فى بادئ الامر. اتصل بى احد اصدقائى من القاهره حيث يعيش ليبلغنى بهذا الحادث والفرحه تسبقه قائلا ( الحق .. المجلس بيولع .. والاعضاء على النار) كانه نال فى احد اعدائه.. فلم اعره اهتماما وظننت ان ذلك احد مقالبه كما تعودت منه ولكن حينما فتحت ايميلى بعد العشاء فؤجئت بنفس الكلام من احد اقاربى من السعوديه ففزعت من مكانى الى التليفزيون ابحث عن نشره اخباريه او اى برنامج فوجدت جميع البرامج تتحدث عن النكبه .. نعم النكبه.. حين تشتعل النيران باهم مبنى فى مصر فهى نكبه.. حين تشتعل النيران وتدق فى المبنى بكامله دون جهاز انذار فهى نكبه.. حين تستمر الحرائق لمده 16 ساعه فهى نكبه .. لم اسمع من قبل عن حريق يستمر فى مبنى لمده 16 ساعه ومع العلم ان هذا المبنى هو اهم مبانى مصر ماذا لو كان الحريق فى بئر بترول او فى غابات امريكا .. بيتهيئ لى كانت النار هتوصلنى فى ميت غمر محنا فى العزبه مش فى جمهوريه لها اسمها وتاريخها .. نحن فى عهد العزبه.. مفيش حتى جردل يا جدعان نطفى به الولعه .. ولا هى العمليه كانت مقصوده ولا ايه؟؟ الظاهر كانت النار لسه موصلتش للى هما عايزينه.. هما فاكرين الناس ايه هبل ولا متخلفين.. نار ايه اللى تولع فى مبنى مفيش حوله اى مبانى ولا غاز ولا متفجرات ..
والله لم اشك لحظه انه حادث مدبر حين سمعت عنه .. وتاكد لى ذلك حين سمعت ان اوراق العباره واكياس الدم الفاسده والمبيدات المسرطنه قد طالها الحريق وكان السيد صفوت شريف قد خرج قبل وقع الحادث وقبل ان تشب النيران فى المبنى ليؤكد ان جميع الاوراق بخير والحمد لله .. حسبى الله ونعم الوكيل .. حسبى الله ونعم الوكيل
العوض على الله فى غرقى العباره .. وفى الناس اللى ماتت بسبب اكياس الدم الملوثه والمبيدات المسرطنه .. فى العزبه مفيش حاجه اسمها جريمه كامله.. عارفين ليه ؟؟.. لانه مفيش حاجه اسمها جريمه اصلا.. كله حق مشروع
لحد امته هتفضل البلطجه والبجاحه والسرقه دى .. لحد امته هنفضل فران .. انا عن نفسى بحب الحكومه وبحب الريس .. وقفه مصريه .. ههههه حلوه الاعلانات بتاع وقفه مصريه اللى مليه شوارع القاهره دى يا ريتنا موقفنا .. عماله تسود .. كفايه يعم نيم الضمير تانى
المجلس ولع مجلس الشعب الجميل الاثرى ده مفيهوش حنفيات مطافى .. مفيهوش انذار ولا رشاشات للمياه فى السقف زى اللى بنشوفها فى افلام امريكا.. اااااااه دى خيال علمى بقه يعنى الحاجات دى اصلا مش موجوده .. طب جردل حتى
وفى الاخر مين هيلبسها .. اى عامل بتاع المونه.. بتاع الدهان.. بتاع الامن ..اى كلب من دول .. ملوش لزمه يعم ده غلبان .. لبسه القضيه يروح فيها .. الميه منه ببلاش.. بقه علشان قضيه يولعو فى البلد .. مش عارفين ان المطافى بتاعتنا على قدها وفى ازمه جرادل .. يا عالم القضيه كانت هتطول مين علشان كده لحقو يدارو الموضوع ؟؟؟؟
انا هحذف البوست ده احسن يلبسوها لى انا .. منا كمان ببلاش
وتظل حكومه نظيف نظيفه الايدى من اى خراب ويظل صفوت والراجل بتاع الموافق يرفع ايده ده هما ...
فلتحيا العزبه .. فلتحيا العزبه
عمار يا بلدى والله مع اول قطر وهنط فيه انا مش عايز اعيش فى التراب ده اكتر من كده.. سباح فى بحور الظلام

جردل .. جردل مفيش جردل

امسك ياجدع .. واحد رايح يطفى .. خد هنا ...

استنو لسه شويه .. الاوضه لسه مولعتش كلها

ايوه كده .. هى دى الحرايق ولا بلاش نادى يبنى المطافى .. ورينا هتعملو ايه

يلا يعم انت و هو خلاص هنعمل ايه كنا عايزين نحبس الراجل بتاع العباره .. خدو حقكم من الراجل بتاع الدهان بقه هو
اللى ولع فى المجلس

صعبان عليه .. هتنام فين الشهرين دول

وانت كمان اى خدمه يعم روح نام بقه براحتك فى بيتكم مفيش مجلس

يعم بلا قرف مجلس ايه هو كان لو لازمه .. ده عامل زى القهوه

يادى القرف هو هيخلص امته علشان نوافق ونمشى


قوم يا حاج متخفش .. انت مكسوف علشان بتنام .. لا هنا النوم عادى قوم نام فوق على الدكه متخفش ومحدش هيقلقك ولا اقولك تيجى تنام على حجر الريس فتحى.. خليك جرئ انت فاكر نفسك فى الكتاب

امه نامت فشخرت .. فلما استيقظت شخرت لها الامم
البيت ده بقه الفاظه وحشه وبتكسف اقوله .. بس بحبه جدا .. معبر

لماذا.. سباح فى بحور الظلام ؟

لماذا سباح فى بحور الظلام؟؟
او لماذا ادون ؟؟ لماذا قمت بانشاء هذه المدونه واضيع وقتى فيها وفى كتابة المقالات والمواضيع ؟؟
اعترف بان المدونه والتدوين شغل حيزا كبيرا من تفكيرى وعلى رغم من انشغالى وضيق وقتى ..اهتم بها وكانى احيا لاجلها ولكن قبل ذلك اسال ونفسى واجيب عليها
لقد دخلت عالم التدوين قريبا بعدما شعرت انى سأتفجر من الضيق والكبت الذى اكسبته لنا حياتنا اليوميه . فانا ارى كل هذا الفساد والفجور والتحول الجذرى الذى يمر به مجتمعنا من حال سئ الى اسوأ ولا استطيع ان اتكلم .. فاين اتكلم ؟؟.. وان تكلمت من سيسمعنى؟؟.. لم يعد لدى ثقه باى انسان اقابله دائما انظر اليه انه سبب تخلفنا او انه شخص لا يكترث بما يحدث بل ويساهم فيه بصمته او بفعله . الكل الان اصبح يساهم فى هدم البلد وتخريبها وبحماس . الكل الان يسعى الى توفير حياة يعتقدها كريمه لنفسه دون اهتمام بشرعيه الوسيله .. انا وبعدى الطوفان.. اما الشباب اللى المفروض انه هيكون ثروه مصر فى الفتره القادمه واللى هينافس شباب الدول الاخرى ويبتكر ويخترع و... فهو غارق غيبوبه الروشنه والامركه والتقليد والنجوميه .. كل شاب يعتقد انه نجم وينبغى عليه ان يلبس احسن لبس ويمتلك احسن موبيل ان شله يكون مش لاقى ياكل بس محدش يقوله يعم الموبيل بتاعك ارميه فى الزباله .. ده راحت عليه ... ذلك الى جانب فساد التعليم و ظهور اعراض الشيخوخه عليه.
كل هذا ادى الى تدهور فظيع فى الشخصيه المصريه وفى شباب مصر.. قلما تجد شابا الان له هدف او فكر . فى حين ان شباب الغرب هم من يقودوا بلادهم ليس شيخوها انظر مثلا الى صاحب موقع الفيس بوك ( facebook) لن تجده الا شابا من عمرنا ولكن انظر الى حجم اعماله فقد صنع موقعا يعتبر دوله كامله ويستطيع ان يفرض فكره واسلوبه على اى دوله يستطيع تشويه اى حدث وكأنه امتلك حق الفيتو ايضا انظر الى موقع جوجل كيف استوحش وتعملق وكم كنت اتمنى ان ارى موقعا مصريا بحجمه فانا حزين لانى مضطر اليه واسهم فى نجاحه بكل حرف ابحث عنه عن طريقه كنت اتمنى ان يكون عربيا او مصريا فهذا جوجل صاحبه ايضا شاب صغير ليس شيخا ولا هرما
ولكن لن يحدث هذا ابدا على ايدى الجيل الموجود حاليا فلا نحزن حين يستعبدنا الغرب او يستعبدنا الولاه والملوك والرؤساء لاننا نستحق ذلك
فأنـا اقـول دائمـا ان هـذا هـو حـق القـوى علـى الضعيـف وعلـى الضعيـف ان يدفـع ثمـن ضعفــه

لكـل المواطـن الحـق فـى ان يضـرب المواطـن اللـى جنبـه علـى قفــاه طالمــا ان هـذا المواطـن لن يشعـر .. وان شعـر لـن يتكلـم.. وان تكلـم لـن يصيـح .. وان صـاح لـن يثـور ...

من هنا اتجهت الى التدوين واطمح الى صنع موقع ينافس كل مواقع العالم العملاقه ليس حبا فى الظهور ابدا والله بل لانى اريد ان اضع العرب والمسلمين على الخريطه (وطبعا الموقع ده مش هيكون المدونه .. ده حلم .. بس فين الامكانيات) ايضا دخلت التدوين عن ثقه انى سأتعامل مع ارقى الناس فكرا واكثرهم تحضرا وفعلا تعرفت على اناس اعتز بمعرفتهم عن طريق هذه المدونه الصغيره واتمنى ان يدوم تواصلى معهم

موسسا شركه جوجل
صاحب موقع facebook
صاحب موقع وردبريسwordpress
موسسا اليوتيوب youtube

صاحبا موقع yahoo

البقيه تاتى....

البقيه تأتى

مستغربا ..مستنكرا... مويدا... بل انى سعيد ....
اراك تتسائل ؟؟
ماذا اقصد بهذه الكلمات؟؟ وما دلاله هذه الكلمات؟؟ مستغربا من ماذا ومستنكرا لماذا؟؟ .. والاغرب ان اكون مؤيد
اتريد ان تعرف عن ماذا اتكلم ..
انا اتكلم عن الحال الذى نحياه جميعا فى بلادنا .. فى مصر بل فى كل الدول العربيه . هل سالت نفسك ما اسباب هذا الحال الذى وصلنا اليه هل هو بسبب سوء السياسه اوالساسه؟؟ ام هو وضع عالمى طالنا منه النصيب الاعظم لو انك جلست مع نفسك جلسه صفاء وفكرت فى هذه الاسئله وربطها بحياتك اليوميه ... فانا على يقين انك ستجد جوابها.
ان الوضع يسوء يوما بعد يوم ولا تكن متفائلا وتأمل ان يصلح الحال فليس هنالك مايدعو للتفائل بالامس غرقت العباره ... واليوم لا نجد رغيف الخبز ولا البنزين.. اصبح رغيف الخبز اصعب من الهيروين فان اردت الهيروين ستجده ولكن ان حاولت الوصول الى رغيف الخبز فى هذا البلد الزراعى فستجد مشقه كبيره فى ذلك . اليوم لا تستطيع ان تدعو صديقك الى وجبه افطار او غذاء او عشاء وان فعلت فلتنبه عليه ان ياتى بخبزه معه . ولا تحاول ان تكون كريما معه ان كنت تمتلك سياره وتعزم عليه بان توصله.. فان فعلت فستواجه مشكله اكبر ان نفذ بنزين السياره حيث الطوابير الطويله والعريضه امام محطات البنزين النادره التى تحتوى على بنزين .. لن اخوض فى شرح الواقع الذى نحياه فكلنا نعلمه علم اليقين اغنياء ام فقراء المال لم يعد ضروريا فحتى لو امتلكت المال لن تجد ماتشتريه به قريبا .
موضوعى هو لماذا كل هذا ؟؟ ماذا فعلنا .. انا ارى ومن حياتى الواقعيه وتجاربى البسيطه فى هذه الدنيا اننا نستحق اكثر بكثير مما يحدث لنا انظر الى الناس كيف ملئ الحقد قلوبهم ..وكيف عمى الغل ابصارهم.. انظر الى الناس وفى معاملتهم بعضهم البعض فى المواصلات وفى الشوراع والعمارات مع الجيران فى المكاتب وحتى فى داخل الاسره الواحده . لا احد يتمنى الخير لأحد ولا أحد يحب لأحد ان يكون احسن منه حتى وان كان عديم الهويه والفائده فهو يريد الناس معه ومثله يعيشون فى الوحل . فوالله مكنت اتصور هذا الا فى الكتب او الافلام العربى ولكنى فعلا لمسته حين تكالب علي بعض الرعاع من قاع المجتمع كى يهدموا مستقبلى ويعرقلو تخرجى..جعل الله كيدهم فى نحرهم .. ولا تسال لماذا يفعلون ذلك بى ؟؟ .. لا تسال فمن وجهه نظرهم لابد ان اكون مثلهم ولا تقوم لى قائمه او شأن. لست انا فقط .. فهذا النموزج من البشر اصبح الاغلبيه العظمى بين المسلمين. تراهم اناس فقراء يملئ القشف جلودهم من مشقه الجرى وراء لقمه العيش فيرق قلبك اليهم وتغضب لحالهم وتتمنى لو تستطيع فعل اى شئ لمساعدتهم.. ولكنهم لا يرفقون لبعضهم وان طال احدهم فى الاخر طائله دهسه بقدميه بلا رحمه . ولهذا نزل علينا جميعا عقاب من السماء فقد جعل الله ملبسنا وماكلنا ومشربنا فى يديى اعدائنا سواء كان هؤلاء الاعداء موحدين لله ورسوله او غير موحدين هذا عقاب الرشوه التى اصبحت ( عــــــــــــــــــادى)..اكراميه.. مساعده.. والربا ( برضو عادى).. والحقد الذى تملك منا ..الغل الذى عمانا والطمع وعدم الرضا بما قسمه الله لنا
افلا نستحق ما يحدث لنا ؟ أنعجب بعد كل هذا ان ينزل علينا الله الجوع والفقر والذل؟
والله انى لسعيد لما يحدث لعل الله اراد هذا كى نفيق من الغيبوبه التى نعيشها