سباح فى بحور الظلام: 2008

مصر زماااااااااان ..قول للزمان يرجع تانى

Posted on الجمعة، سبتمبر 26، 2008 by Dr ayman

EGYPT at the beginning of 20th century

بسم الله الرحمن الرحيم

السلام عليكم ورحمة الله وبركاته

جميعنا يحب مشاهدة الصور القديمة .. وخاصة إذا كانت هذه الصور لأماكن مازالت موجودة حتى الآن وربما زرناها
حرصت ألا تكون الصور لأماكن صماء .. وإنما صور لأشخاص عاشوا قبلنا وسنعرف الكثير عن حياتهم وعاداتهم حتى تكون الصور بها حيوية
ولنركب آلة الزمن الخاصه بزوار سباح فى بحور الظلام لنتجول بها في سحر الماضي وعبق التاريخ (الصور منقووووله )

وسيلة الإنتقال الفارهة ..
ما ترونه الآن كأنها مرسيدس آخر موديل في وقتنا
فلن يركبوا على ظهر الجمل .. وإنما في حجرة معتدلة .. وتغطيهم من الشمس
أكيد وقتها كان الناس لما تشوف حاجه زى دى معديه عليهم بسرعه البرق وهما قاعدين على بير مسعود كانو بيتمنو يمتلكوها
كانت هذه هي الطريقة التي تنتقل فيها العروسة إلى بيت زوجها ، ويتم تزيين الجمل كما نزين السيارات هذه الأيام
الحجرة التي على الجمل مزخرفة بشكل جميل ومصنوعة بما يسمى اليوم ( أرابيسك )

إحدى الحارات المصرية القديمة ..
لاحظوا البيوت وعليها المشربيات من الخارج .. وغالبية البيوت في مصر القديمة كان عليها مشربية .. وذلك للحفاظ على خصوصية من في البيت .. ولها أيضاً دور في تكييف الهواء بالداخل

أحد المقاهي القديمة ..
لكنها في حي شعبي قديم .. بعكس مقاهي القاهرة القديمة في الأحياء الراقية التي كانت اجتماع نخبة الأدباء والشعراء
شايفينن الواد بليه

ياسلام....
منظر عام للدقي من إحدى البلكونات
لا عمارات .. ولا زحمة .. ولا سيارات
البيوت وقتها كانت كما ترونها .. عبارة عن فلل بحد أقصى 3 أدوار .. وكانت كل فيلا أمامها بعض الأشجار داخلة في ملكية الفيلا
جزء كبير من هذه الفلل موجود حتى الآن وبالذات في مصر الجديدة والدقي وحلوان ..
حيث كان يقيم فيها اليونانيون الذين أقاموا فترة كبيرة في مصر لقربهم منها

صورة المزارعين وهم يستعدون للمرور من على كوبري قصر النيل
(ايام مكانت مصر مفيهاش غير تلات كبارى )
كان الإنتقال وقتها مقابل قرشين .. وكان يتم إعفاء الأطفال دون الـ 6 سنوات
زى القطر عندنا كده

أفراد الجيش البريطاني أثناء الحر العالمية الثانية وهم ( ملمومين ) على أبو الهول
كان قريباً من الأرض وقتها لأن جزءاً كبيراً من جسمه كان مدفوناً تحت الرمال
لذا كانوا يصعدون على كتفه لأنه قريب منهم لحد موقعو منخيره

جنرالات الحرب العالمية الثانية في لقطة تاريخية أمام الأهرامات
الحرب كانت من 1939 إلى 1945
شايف التناكه.. طبعا كانو اسياد العالم
بس فى واحد بينهم اشك انه انجليزى

صورة قديمة لجامعة القاهرة .. في الجيزة
مشهورة بالقبة والساعة الموجودتين حتى الآن ..
تم إنشاء الجامعة عام 1908 وكان اسمها في أول الأمر : الجامعة المصرية
ثم تغير الإسم إلى جامعة فؤاد الأول
وبعد الثورة تم تسميتها جامعة القاهرة
وجارى تحويلها الان الى محل علف لزوم الفهم ..طبعا العيب مش فينا ..
بلا فخر هذه الجامعه الان تحتل المركز 2000 وشويه على العالم وال 11 على افريقيا وطبعا الاول على مصر
فى حين ان جامعات جنوب افريقيا تحتل ال 11 مركز الاوائل على افريقيا
واسرائيل ضمن اول 1000 على العالم على ما اتذكر وطبعا امريكا اول 50 جامعه على العالم بدون مقاطعه

جمع غفير من المصلين بعد صلاة الجمعة في الجامع الأزهر
كان هذا المسجد ليس مجرد مسجداً للصلاة فقط .. وإنما كان له دوراً سياسياً كبيراً جداً
فمعظم الثورات ضد الإنجليز كانت تقام منه بعد صلاة الجمعة ، وكان نابليون يذهب إلى شيخ الأزهر بدلاً من الحاكم كي يترك أثراً طيباً في نفوس الناس
تأملوا الناس في الصورة السابقة .. منهم من يرتدي بدلة وكأنه يعيش بيننا الآن .. والغالبية تلبس الزي الطبيعي وهو عباية وعلى الرأس طربوش
وتلاحظوا وجوه من أفريقيا في الصورة .. فقد كانت تأتي للدراسة في الأزهر على نفقته .. ومازال الأزهر يقدم هذه الخدمة المجانية لمسلمي أفريقيا وشرق آسيا وأوروبا
هيه .. فين الازهر ايام ما كان ازهر قبل ميخد مقرراته وفتاويه من امريكا

خزان أسوان ..
وهو السد الذي كان موجوداً قبل بناء السد العالي ، ووظيفته أنه يحجز مياه الفيضان للإستفادة منها في الري ، لكنه كان لا يحجزها لأكثر من سنة وبعد كده يطلعها على دماغ الناس
المهندسين الذين بنوا السد كانوا يستريحون في جزيرة بالقرب من أسوان اسمها جزيرة إلفنتين .. وهي الآن مزاراً سياحياً مهماً
الصورة السابقة التقطت عام 1906 بكاميرا موبيل المهندس المنفذ ايام الموبيلات الخشب

مؤذن فوق أحد مآذن مساجد القاهرة القديمة
كل ما في الصورة السابقة مازال موجوداً طبق الأصل .. القلعة من بعيد وبعض المساجد الأخرى .. وما بينهما عبارة عن مقابر المماليك
كان المؤذن يصعد أعلى المئذنة ويؤذن بدون مايكروفونات

صورة كانت تتكرر صباح كل يوم .. ومازالت تتكرر حتى الآن ولكن بطرق مختلفة
حيث يقف أحد البائعين صباحاً وأمامه عربة وبها الفطار ويتجمع حوله العمال لتناول الفطار قبل الذهاب للعمل
واعتقد انا شخصيا انه ببيع فول ( رفيق المواطن المصرى )

بائع ألومينوم داخل أحد حواري مصر القديمة
رغم أن الصورة منذ عام 1905 إلا أن الوجوه مألوفة .. وسبحان الله الإبتسامة عليهم منذ القدم
وواضح طبعاً بأنهم كانوا وقتها في الشتاء
بمناسبه الالومونيه
كنت راكب فى المواصلات قريب واذا بعائله غايه فى الكوميدا تركب.. رجل وامه العجوز واخواته وابنائه.. وملو العربيه عن اخرها
السواق يقود مسرعا .. الام العجوز يصيبها الفزع .. طبعا وسائل النقل ايامها كانت اكثر امان .. تقول للسائق ( براحه يخويه انت هتطير بنا ياك ساروخ اما يلهفك) الابن .. خايفه من ايه يامه منتى قاعده ورى ومش هيجرالك حاجه .. تعالى قعدى قدام علشان لما السواق يضرب فرمله تلزقى فى الازاز ونخلص.. فاصل من الضحك..
البنت لامها فين حله الالومونيه بتاعتى يامه اللى خدتيها .. السائق مستعجبا وكأنه كان بيحمل النمسا ومش من مصر الومونيه ...!!! الام بلهجه الغناء المرح .. اه ياخويه .. الالومونيه حلت ستك ياوله .. عائله قمه الكوميديا والبساطه والمرح .. عائله مصريه لسه على طبيعتها وكأنها لم يأتى عليها غبار الزمن ولم تتأثر بموجات العولمه والحضاره الحديثه .. وطبعا استمرت القفشات و الايفهات المضحكه الى اخر الطريق .. كانت احسن مواصله ركبتها فى حياتى .. وخرجتنى من الجو الوحش اللى كنت فيه

صورة اخري لآفطار العمال في الصباح...

عمليه نقل المياه من النيل للبيوت مباشره حيث لم تكن يد التلوث قد وصلتهم بعد

جزء من الآثار الفرعونية في أسوان وهي غارقة
قبل بناء السد العالي كان كل عام يأتي الفيضان ويهدم القرى ويغرق المنازل ويدمر الأراضي الزراعية ، لذا كان التفكير في بناء السد العالي
والصورة السابقة تم تصويرها أثناء الفيضان بموبيل نفس المهندس

هذه الصورة تعود إلى عام 1922 وذلك عندما تم اكتشاف مقبرة توت عنخ آمون في الأقصر
وهي المقبرة الوحيدة التي وجدوها كاملة المجوهرات وممتلكات الملك
اكتشفها أحد العلماء البريطانيين بتمويل من مليونير بريطاني كان من ضمن القلائل الذين يمتلكون سيارة في بريطانيا
وما تشاهدوه في الصورة هو أحد العمال عندما كان ينقل الآثار من المقبرة لترحيلها إلى المتحف المصري بالقاهرة

روعــــــــــــــه.....
منظر غير موجود ولن تراه أبداً .. الأهرامات وبجانها نهر النيل
حيث كان أحد فروع النيل يسير بمحاذاة الأهرامات .. وقد نقل الفراعنة الأحجار إلى هذا المكان بواسطة سفينة كانت تسير في هذا الفرع
السفينة موجودة حتى الآن وتعرض في متحف بالقرب من الأهرامات .. اسمها سفينة الشمس
وهي سفينة ضخمة جداً ولا يمكن أن تستوعبها صورة واحدة

اتمنى الصور تعجبكم.. انا لما شوفتها صممت انقلها علشان كلكم تشوفوها

موقف لن يتكرر معى

Posted on الثلاثاء، سبتمبر 23، 2008 by Dr ayman

استغفر الله العظيم من كل ذنب عظيم
اللهم اهدنى .. وعلمنى ..وعف لسانى
اللهم وفق قاريء هذه الرسالة، و أعنه على ذكرك و شكرك و حسن عبادتك، اللهم وفقه لما تحب و ترضى، اللهم أحسن خاتمته، و أجعل قبره روضة من رياض الجنات، اللهم ارحمه و ارضى عنه، و ارزقه الجنة التي وعدت عبادك الصالحين، اللهم انصر الإسلام و المسلمين، و أذل الشرك و المشركين، و دمر أعداء الدين و أجعل تدبيرهم تدميرهم يا ذا الجلال و الإكرام

يا عزيزى كلنا لصوص

Posted on الخميس، سبتمبر 18، 2008 by Dr ayman

ورقصنى ياجدع

بعد موجه بيع و خصخصه المصالح والمصانع الحكوميه بالعام الماضى سعيا لما قالو عنه ( احنا بنواكب العصر .. عصر الراسماليه) يبدو ان الاثر جاء سريعا وخوت جيوب بعض الحراميه من فلوس الشعب الغلبان فقالو نعمل ايه ياولاد .. نجيب فلوس منين .. خلاص معتش فيه مصانع ولاموارد دخل.. البلد مصادرها قلت .. طب والعمل هنجيب فلوس منين علشان حساب بنوك سويسرا يزيد والحراميه الصغيرين يلاقو اكل قامو فكرو انهم يستغلو الفلوس الزياده اللى فى جيوب الشعب الغلبان ويلمو ضرايب قال ايه.. الحلاق يدفع ضرايب ويعمل فاتوره والدكتور كمان يعمل فاتوره والسواق اهو كده كده مش ملاحق على الحراميه اللى على الطريق واى عامل او صنايعى المفروض يعمل فاتوره .. طب والنبى الناس دى تدفع ضرايب ليه.. اكن انا اما اروح لحلاق اقوله هات فاتوره .. ده اسمه كلام ناس عاقلين ناقص اقوله لملى الشعر بتاعى فى كيس .. دول ناس عايشين حياتهم يوم بيوم اللى بيكسبه فى اليوم بياكل بيه يعنى لو تعب يوم ولا نام فى السرير اسبوع هيطلع يشحت ياما هيموت من الجوع ..ساعتها البلد هتديله فلوس ياكل منها .. هما مفكروش فى الحكايه دى طبعا الحكومه الموجوده حاليا لا تختلف عن اللى قبلها كلهم كانو زى بعض بس هو الفرق فى حاجه ضغيره .. الحكومات اللى فاتت كانت بتعمل خطط طويله المدى للنصب على الناس اما الحاليه فهى معندهاش صبر وعملت خطط فوريه لمص دماء الغلابه قالو لنا ده نظام راسمالى ولازم البلد تدخل فيه ونواكب العالم ونرفع الضغط عن الحكومه وندى للفرد فرصه اكبر فى التنميه.. طب هو الفرد لاقى ياكل اصلا هو فى مرتبات فى مصر .. هو فى مصانع فى مصر .. دحنا بنشحت العيش من امريكا يا اغبيه..هى الراسماليه دى معناها انك تخلى واحد زى عز ينفرد بواحده من اهم السلع الاستراتيجيه لاى بلد وادينا شوفنا النتيجه .. وشوفنا عز عمل ايه .. المفروض اى دوله لما بتدخل هذا النظام بتدخل فيه واحده واحده وخصوصا لو كانت دوله فقيره زينا مش قفش .. طبعا كلنا عارفين ان مسيره الخصخصه لسه مستمره لسه التامين الصحى والتعليم وغيره عن قريب بس طبعا هى مش اسمها خصخصه بالمعنى المفهوم اسمها اقطاع .. ايوه للحبابيب يعنى والمحاسيب.. طبعا هى بلدنا دى عزبه ابوهم واحنا مالنا احنا طب لما انتو هتخصخصو كل حاجه يعنى مش هنتعالج ببلاش ولا هنتعلم ببلاش بتطلبو مننا ضرايب ليه .. اسف احنا فعلا بنشرب ميه معفنه ببلاش وبنشم هو بردو ببلاش تخيلو
طيب خلينا نقول الحكومه بتعمل كده علشان تبنى البلد .. البلد كل يوم فعلا بتعلى وبتتقدم بينا.. مصر بتتقدم بينا يولاد والحق القطر..
ومش هتكلم عن كميه المصايب والنصب عينى عينك اللى حصل فى سنه 2008 بس .. انا اصلا مش هعرف اعدهم. والحق القطر.

وردا على موجه النصب من الحكومه قرر الشعب ايضا انه ينصب هو كمان وكله بينصب على كله.. انبارح لاقيت شحات داخل الجامع عنده بتاع 30 سنه كده وشباب وزى الفل وحطط برفان تخيلو الشعب حاطط برفان ومعاه كيس فى علب دوى فاضيه (لزوم الشغل) وماشى بقمه التناكه وبيقول بربى فى كوم لحم والله انا اول مشوفته فى الجامع مقدرتش امسك نفسى من الضحك .. ايه الهبل ده .. هى بقت كده؟؟ طبعا انتو مش متخيلين شكله ..والله لو خبطى كف ليلزقنى على الحيطه ده هو اصلا انضف منى ولكن انا احييه هو هيعمل ايه مهى ده الشغلانه الوحيده اللى الدوله بتتدعمها ومبتخدش منها ضرايب وانتظرو قريبا طرق جديده فى الشحاته بعد ظهور مكبرات الصوت والموبيل والدش .. اه مهو فيه قنوات بتاع ناس شحاتين ولا مش شايفين مسابقات الشحاته.. جاوب على السوال واكسب 100 جنيه .. محمد اللى قاعد جانبى ده اسمه ايه؟؟ .. وكله بينصب على كله ومحدش بيقول لأ ولا حد فاضى يفكر ولا حد بيتحرك الحكومه تنصب واحنا ننصب والبلد كلها بقت مستنقع نصب .. الخواجات بينزلو مصر مبيرجعوش تانى . طبعا عارفين ليه
ختامى بحكم عظيمه
ابدنى تجدنى
الرجل المناسب فى المكان الغير المناسب
مصر هى امى والشعب بياكل زبادى

اللى يجاوب ..يكسب شنطه شحاته بكل مستلزماتها بما فيها كيس الدوى
كم عدد النصابين فى مصر؟
كم عدد المصايب فى عام 2008؟
اذكر اسم نقيب الشحاتين فى مصر؟؟ حد عارفه
علل.. اصابه اكتر من نص الشعب بتورم فى اعلى القفه خلال العام الماضى

ادينا بنتعلم.. مفيش حاجه ببلاش

Posted on الجمعة، سبتمبر 05، 2008 by Dr ayman

بسم الله
اكتب اليوم بوست جديد على صفحات مدونتى تقرأونه كما تقرأون اى بوست يسبقه او اى بوست على صفحات الاف المدونات الاخرى شرقها وغربها..
ولكن حين اقول ان هذا البوست هو اهم ما كتبته طيله حياتى الماضيه .. حين اقول ان هذا البوست هو نتيجه اكبر اختبار مررت به فى حياتى الى الان.
هذا البوست استخدم فى صياغته 28 حرفا كلنا نعرفهم وتعودنا على رؤيتهم ولكنى اليوم ارتبهم كى تنقل لكم تجربه مريره مررت بها ولعلها تنجح فى نقل ما شعرت به وما تركته فى نفسى هذه التجربه.. فانا اسطر هذه السطور واكتب هذه الكلمات والحروف بروحى ووجدانى وكيانى كله.. حين تعلمون انى اهتز بكل جوانحى وانا اكتب اليكم فستعلمون قيمه هذه الكلمات فى نفسى
فانا امر هذه الفتره بتجربه لن انساها .. درس صغير من دروس الدنيا ولكنه قاسى علي فهذه اول تجاربى الحقيقيه
اول تجربه امر بها واخرج منها واقول لقد تعلمت شئ فى الحياه
لعلنا جميعا فى مقتبل العمرولعلكم جميعا فى مثل سنى حيث عالم النت الذى لايدخله سوى من هم فى مثل عمرنا
انا فى مرحله العشرينات من عمرى وهذا السن فى نظرى هو اهم مرحله فى حياه كل انسان فهو مرحله تكوين الشخصيه ونحتها بالشكل النهائى الذى ستعيش به وتتعامل به مع الحياه
هذا السن الذى يتحدد فيه هويتك وتكتشف فيه معالم نفسك وتتكون فيه عماد افكارك واظن ان اى حدث او شدة تمر بها فى هذا الوقت ستترك اثرا كبيرا عليك اكثر من اى وقت قبله او بعده
لذا فانا اعتبره منحنى مهم جدا فى رحلتك فى هذه الدنيا بل انه اهم منحنى تمر به.. حين تمر فى هذا المنحنى الخطير بأزمه تهز كيانك وتزلزل اركانك وتخلعك من جدورك فهذا ليس بامر سهل
ومن الممكن ان يحول مسار حياتك كله دون سابق تخطيط او اعتبار يمكن ان يخلق منك شخص لم تكن ليوم لتتوقعه او تعرفه
حين يمر الانسان بأزمه قويه .. تكون اخطر مراحلها هى المرحله التى تلى الحدث مباشره حين يكون فى حاله اللاتوازن وانعدام القدره على التفكير والتركيز او مرحله تغيب العقل.. فى هذه المرحله.. يمكنك ان تقدم على شئ تندم عليه بعد ذلك وربما تقدم على عمل يقضى عليك نهائيا وعلى مستقبلك ولا تستبعد اى شئ. او تقول انى معصوم من شئ فكلنا نتحسى الطرق تحت رحمه القدر وما يخفيه لنا. دليلى على ذلك مثل بسيط فى الطب ..لدينا فى الطب حين نقابل حاله اصابتها صائبه شديده ..سواء بدنيه او نفسيه كصدمه اصابت المخ بارتجاج على سبيل المثال او صدمه نفسيه قويه فان المريض يذهب الى حاله من الغيبوبه سواء البدنيه او النفسيه وهى ما تسمى بال ( shock stage)
او مرحله الصدمه وتكون اخطر مراحل الاصابه فان تعافى منها المريض على الخير فيمكن ان تمر اصابته بسلام وهى مرحله لا يظهر فيها اى من اعراض المرض ولا يمكنك تكهن حجم الاضرار بها فقط عليك الانتظار حتى تمر هذه المرحله لتعرف مدى الاصابه واثرها
وانقل لكم تجربه مررت بها لا تختلف كثيرا عن المثال التى ذكرته من قبل فهذه التجربه قلبت حياتى وموازينى راسا على عقب تعلمت منها الكثير لدرجه انى اصبحت اخاف ان اتعلم اكثر من ذلك واخاف ان ارى الدنيا بوجهها الحقيقى اكثر من ذلك لم اكن اتخيل الدنيا بهذه القذاره ولم اكن اتخيل الناس بهذا الشر والغباء والحقد.. ولكنى احمد الله ان بدءت اتعافى من هذا الدرس القاسى
واركز اكثر فى حياتى ومستقبلى يكفينى ما عرفته .. الان لدى رصيد من الخبره لاعيش بين الناس واتعامل معهم وان كان ليس كل المنهج .. فاكثر الامور صعوبه هذه الايام هو ان تتعامل مع البشر وااسف شديد الاسف حين اقول التعامل مع الحيوانات اهون واسهل بكثير .. ان تتعامل مع اسد تعرف خطره اسهل من التعامل مع انسان مريض لا تعرف الشر الذى يخفيه لك بين ضلوعه
كنت احيى بين الناس وحلمى اراه مختلف تماما عن بقيه اصدقائى فلدى ميول قويه للخير وخدمه الناس ومساعدتهم واحلم بان اساعد كل انسان وان يكون ذات يوم لى شأن بحيث ان قصدنى انسان فى خدمه البيها له واسعد بان ارسم الابتسامه على وجهه واحمد الله انى اسعى لذلك دائما ولدى ما اذكره فى ذلك ولكنى لم اكتب لاسرد مواقفى الخيريه بل اكتب لافضفض ولكى اجعل هذا الموقف امامى دائما على هذه المدونه
فقد اوقعنى القدر فى يد خنزير اراد بكل قوته ان يقضى علي ويحطم دنيتى انتهز كل فرصه وسلك كل طريق من اجل ذلك وزاده طمعه فى المال والدنيا وتحين الفرص للمساومه والابتزاز واعجب انه لم يذكر معروفى حين جعلنى الله سببا فى انقاذ احدى اهم ما يملكه فى الدنيا ولكنه نسى ذلك وتملك الحقد والغل والطمع منه .. فهؤلاء يعيشون كالخراف ..والجبن سيدهم اذلهم الله ..اكاد اقول انه الان اصبح يسير وسط الناس وكأنه عارى بعدما انكشفت للناس كل الاعيبه وفضح الله امره بلسانه فقد جعل لى الله مخرجا من كيده وتدبيره رغم كل الابتلاءات والادعاءات التى اطلقها كى يدعم بها موقفه الحيوانى ولم يطلنى من ذلك اذى بحمد الله غير الذى تعلمته ولكنه ليس بأذى بل هو مكسبى فقد خرجت من هذه الموقف اكثر ثقة واعتزازا بنفسى
فليحفظنى الله من شرهم وليجعل كيدهم فى نحرهم وليعطى كل على قدر ما نوى..
اللهم انى لا اسالك رد القضاء ولكنى اسالك اللطف فيه ولله الحمد من قبل ومن بعد

كثيرا ما نسمع اقوال ماثوره وحكم ومواعظ كما ..اعرف صحبك وعلم عليه.. والصديق وقت الضيق وغيرها من الحكم التى لا احفظها جيدا ولكنى اعرفها ولكن حين تمر بازمه تعرف فعلا مدى صدق هذه الاقوال وعمق تعبيرها
فانا اعرف اليوم من صديقى ومن عدوى الذى عاش ينافقنى ويتمنى لى الشر والمهالك دون سابق اذى منى. فهذا صديقى الصيدلى الذى لم يسمع بما حدث لى حتى اسرع الى ليلقى على اقذر كلمات الشماته والفرح ووالله لم اكن له غير صديقه الوحيد ..الان عرفت لما يجتنبك الناس ..تعلمت ايضا ان مبالغتى فى حب الناس وخدمتهم حتى فى المستشفى حين اعامل المريض على انى خادمه.. هو امر خاطئ فالعالم ليس بهذه البراءه ولا تتخيلون انى اقول ذلك نتيجه تاثير موقف على نفسى .. دعكم من هذه الشعارات والكلمات التى نتبادلها على الورق .. العالم فعلا ليس بهذه البراءه نحن نعيش فى الغابه وما يجرى لنا هو عقاب وغضب من الله انزل علينا نتيجه لافعالنا المشينه فى حق بعضنا البعض
فالشر كالوحش يختبئ بيننا وفى نفوس مرضانا ويتحين الفرص وينتهز المواقف لينقض علينا ولايفرق بين طيب وخبيث فحامله مريض ولا يهتم لذلك. لذا فلابد من اعاده الحسابات ووضع حدود جديده تحمى بها نفسك وفى نفس الوقت لا تمنعك من تاديه واجبك نحو مجتمعك فهذه مهمتنا فى الحياه ولن يمنعنى ذلك الجرح ان اغير او احاول التغيير فى الوضع الذى نعيشه .. نعم كوتنى التجربه ولكنى لم احترق
احلم بالمدينه الفاضله التى تمناها افلاطون ومات دونها ..احلم ان اعيش فى عهد الانبياء ..احلم ان اعيش وسط رجال لهم فكر وثقافه وهدف فى الحياه.. لا احترم من يحيا ليومه ونفسه فكم من اناس عاشو وماتو ولم يتركو بصمه يذكرهم بها الناس وكأنهم لم يأتو الى الدنيا
لا اريد ان اكون كمثلهم ليس طمعا فى جاه او سلطان او شهره ولكنه احتراما لنفسى وعقلى الذى وهبنيه الله. اريد ان اقف بين يدى الله واجيبه حين يسالنى ماذا قدمت للناس وللمسلمين .. حين يسالنى هل افدتهم ام انك لم تفعل بأمرى فى عمران الارض

هذه الكلمات القاسيه والتى اداوى بها جرحى اكتبها لكى تكون امامى دائما واما اعينكم لعلها تفيدكم شيئا
فلتجعل لنفسك ذكرى ولاتمر مرور الكرام فى الدنيا ولتحذر شر الناس وكما قالو احذر ولكن لا تخون ولتجعل هدفك ارضاء الله وارضاء نفسك وليس ارضاء الناس فلن ترضيهم مهما فعلت

ازمه جرادل فى البلد تخلى مجلس زى مجلس الشعب يولع .. والناس تتكلم

Posted on الخميس، أغسطس 21، 2008 by Dr ayman

بسم الله
فوجئنا جميعا بالامس بحريق كبير فى مجلس الشعب والشورى المصرى .. لم اكن اصدق ذلك فى بادئ الامر. اتصل بى احد اصدقائى من القاهره حيث يعيش ليبلغنى بهذا الحادث والفرحه تسبقه قائلا ( الحق .. المجلس بيولع .. والاعضاء على النار) كانه نال فى احد اعدائه.. فلم اعره اهتماما وظننت ان ذلك احد مقالبه كما تعودت منه ولكن حينما فتحت ايميلى بعد العشاء فؤجئت بنفس الكلام من احد اقاربى من السعوديه ففزعت من مكانى الى التليفزيون ابحث عن نشره اخباريه او اى برنامج فوجدت جميع البرامج تتحدث عن النكبه .. نعم النكبه.. حين تشتعل النيران باهم مبنى فى مصر فهى نكبه.. حين تشتعل النيران وتدق فى المبنى بكامله دون جهاز انذار فهى نكبه.. حين تستمر الحرائق لمده 16 ساعه فهى نكبه .. لم اسمع من قبل عن حريق يستمر فى مبنى لمده 16 ساعه ومع العلم ان هذا المبنى هو اهم مبانى مصر ماذا لو كان الحريق فى بئر بترول او فى غابات امريكا .. بيتهيئ لى كانت النار هتوصلنى فى ميت غمر محنا فى العزبه مش فى جمهوريه لها اسمها وتاريخها .. نحن فى عهد العزبه.. مفيش حتى جردل يا جدعان نطفى به الولعه .. ولا هى العمليه كانت مقصوده ولا ايه؟؟ الظاهر كانت النار لسه موصلتش للى هما عايزينه.. هما فاكرين الناس ايه هبل ولا متخلفين.. نار ايه اللى تولع فى مبنى مفيش حوله اى مبانى ولا غاز ولا متفجرات ..
والله لم اشك لحظه انه حادث مدبر حين سمعت عنه .. وتاكد لى ذلك حين سمعت ان اوراق العباره واكياس الدم الفاسده والمبيدات المسرطنه قد طالها الحريق وكان السيد صفوت شريف قد خرج قبل وقع الحادث وقبل ان تشب النيران فى المبنى ليؤكد ان جميع الاوراق بخير والحمد لله .. حسبى الله ونعم الوكيل .. حسبى الله ونعم الوكيل
العوض على الله فى غرقى العباره .. وفى الناس اللى ماتت بسبب اكياس الدم الملوثه والمبيدات المسرطنه .. فى العزبه مفيش حاجه اسمها جريمه كامله.. عارفين ليه ؟؟.. لانه مفيش حاجه اسمها جريمه اصلا.. كله حق مشروع
لحد امته هتفضل البلطجه والبجاحه والسرقه دى .. لحد امته هنفضل فران .. انا عن نفسى بحب الحكومه وبحب الريس .. وقفه مصريه .. ههههه حلوه الاعلانات بتاع وقفه مصريه اللى مليه شوارع القاهره دى يا ريتنا موقفنا .. عماله تسود .. كفايه يعم نيم الضمير تانى
المجلس ولع مجلس الشعب الجميل الاثرى ده مفيهوش حنفيات مطافى .. مفيهوش انذار ولا رشاشات للمياه فى السقف زى اللى بنشوفها فى افلام امريكا.. اااااااه دى خيال علمى بقه يعنى الحاجات دى اصلا مش موجوده .. طب جردل حتى
وفى الاخر مين هيلبسها .. اى عامل بتاع المونه.. بتاع الدهان.. بتاع الامن ..اى كلب من دول .. ملوش لزمه يعم ده غلبان .. لبسه القضيه يروح فيها .. الميه منه ببلاش.. بقه علشان قضيه يولعو فى البلد .. مش عارفين ان المطافى بتاعتنا على قدها وفى ازمه جرادل .. يا عالم القضيه كانت هتطول مين علشان كده لحقو يدارو الموضوع ؟؟؟؟
انا هحذف البوست ده احسن يلبسوها لى انا .. منا كمان ببلاش
وتظل حكومه نظيف نظيفه الايدى من اى خراب ويظل صفوت والراجل بتاع الموافق يرفع ايده ده هما ...
فلتحيا العزبه .. فلتحيا العزبه
عمار يا بلدى والله مع اول قطر وهنط فيه انا مش عايز اعيش فى التراب ده اكتر من كده.. سباح فى بحور الظلام

جردل .. جردل مفيش جردل

امسك ياجدع .. واحد رايح يطفى .. خد هنا ...

استنو لسه شويه .. الاوضه لسه مولعتش كلها

ايوه كده .. هى دى الحرايق ولا بلاش نادى يبنى المطافى .. ورينا هتعملو ايه

يلا يعم انت و هو خلاص هنعمل ايه كنا عايزين نحبس الراجل بتاع العباره .. خدو حقكم من الراجل بتاع الدهان بقه هو
اللى ولع فى المجلس

صعبان عليه .. هتنام فين الشهرين دول

وانت كمان اى خدمه يعم روح نام بقه براحتك فى بيتكم مفيش مجلس

يعم بلا قرف مجلس ايه هو كان لو لازمه .. ده عامل زى القهوه

يادى القرف هو هيخلص امته علشان نوافق ونمشى

قوم يا حاج متخفش .. انت مكسوف علشان بتنام .. لا هنا النوم عادى قوم نام فوق على الدكه متخفش ومحدش هيقلقك ولا اقولك تيجى تنام على حجر الريس فتحى.. خليك جرئ انت فاكر نفسك فى الكتاب

امه نامت فشخرت .. فلما استيقظت شخرت لها الامم
البيت ده بقه الفاظه وحشه وبتكسف اقوله .. بس بحبه جدا .. معبر

لماذا.. سباح فى بحور الظلام ؟

Posted on الثلاثاء، أغسطس 12، 2008 by Dr ayman

لماذا سباح فى بحور الظلام؟؟
او لماذا ادون ؟؟ لماذا قمت بانشاء هذه المدونه واضيع وقتى فيها وفى كتابة المقالات والمواضيع ؟؟
اعترف بان المدونه والتدوين شغل حيزا كبيرا من تفكيرى وعلى رغم من انشغالى وضيق وقتى ..اهتم بها وكانى احيا لاجلها ولكن قبل ذلك اسال ونفسى واجيب عليها
لقد دخلت عالم التدوين قريبا بعدما شعرت انى سأتفجر من الضيق والكبت الذى اكسبته لنا حياتنا اليوميه . فانا ارى كل هذا الفساد والفجور والتحول الجذرى الذى يمر به مجتمعنا من حال سئ الى اسوأ ولا استطيع ان اتكلم .. فاين اتكلم ؟؟.. وان تكلمت من سيسمعنى؟؟.. لم يعد لدى ثقه باى انسان اقابله دائما انظر اليه انه سبب تخلفنا او انه شخص لا يكترث بما يحدث بل ويساهم فيه بصمته او بفعله . الكل الان اصبح يساهم فى هدم البلد وتخريبها وبحماس . الكل الان يسعى الى توفير حياة يعتقدها كريمه لنفسه دون اهتمام بشرعيه الوسيله .. انا وبعدى الطوفان.. اما الشباب اللى المفروض انه هيكون ثروه مصر فى الفتره القادمه واللى هينافس شباب الدول الاخرى ويبتكر ويخترع و... فهو غارق غيبوبه الروشنه والامركه والتقليد والنجوميه .. كل شاب يعتقد انه نجم وينبغى عليه ان يلبس احسن لبس ويمتلك احسن موبيل ان شله يكون مش لاقى ياكل بس محدش يقوله يعم الموبيل بتاعك ارميه فى الزباله .. ده راحت عليه ... ذلك الى جانب فساد التعليم و ظهور اعراض الشيخوخه عليه.
كل هذا ادى الى تدهور فظيع فى الشخصيه المصريه وفى شباب مصر.. قلما تجد شابا الان له هدف او فكر . فى حين ان شباب الغرب هم من يقودوا بلادهم ليس شيخوها انظر مثلا الى صاحب موقع الفيس بوك ( facebook) لن تجده الا شابا من عمرنا ولكن انظر الى حجم اعماله فقد صنع موقعا يعتبر دوله كامله ويستطيع ان يفرض فكره واسلوبه على اى دوله يستطيع تشويه اى حدث وكأنه امتلك حق الفيتو ايضا انظر الى موقع جوجل كيف استوحش وتعملق وكم كنت اتمنى ان ارى موقعا مصريا بحجمه فانا حزين لانى مضطر اليه واسهم فى نجاحه بكل حرف ابحث عنه عن طريقه كنت اتمنى ان يكون عربيا او مصريا فهذا جوجل صاحبه ايضا شاب صغير ليس شيخا ولا هرما
ولكن لن يحدث هذا ابدا على ايدى الجيل الموجود حاليا فلا نحزن حين يستعبدنا الغرب او يستعبدنا الولاه والملوك والرؤساء لاننا نستحق ذلك
فأنـا اقـول دائمـا ان هـذا هـو حـق القـوى علـى الضعيـف وعلـى الضعيـف ان يدفـع ثمـن ضعفــه

لكـل المواطـن الحـق فـى ان يضـرب المواطـن اللـى جنبـه علـى قفــاه طالمــا ان هـذا المواطـن لن يشعـر .. وان شعـر لـن يتكلـم.. وان تكلـم لـن يصيـح .. وان صـاح لـن يثـور ...

من هنا اتجهت الى التدوين واطمح الى صنع موقع ينافس كل مواقع العالم العملاقه ليس حبا فى الظهور ابدا والله بل لانى اريد ان اضع العرب والمسلمين على الخريطه (وطبعا الموقع ده مش هيكون المدونه .. ده حلم .. بس فين الامكانيات) ايضا دخلت التدوين عن ثقه انى سأتعامل مع ارقى الناس فكرا واكثرهم تحضرا وفعلا تعرفت على اناس اعتز بمعرفتهم عن طريق هذه المدونه الصغيره واتمنى ان يدوم تواصلى معهم

موسسا شركه جوجل

صاحب موقع facebook

صاحب موقع وردبريسwordpress

موسسا اليوتيوب youtube

صاحبا موقع yahoo

فهرس المدونات المصريه

Posted on الاثنين، أغسطس 11، 2008 by Dr ayman

بسم الله
فكرت فى القسم كثير قبل ان افعله لكن لا تاجيل بعد اليوم حيث اننى لست الوحيد الذى فكرت بهذا كما اكتشفت ..ولكن ان شاء الله اعدك ان يكون هذا اكبر دليل لمدونى مصر
شرط عرض المدونات فى فهرس المدونات المصريه
ان تكون مدونه لا تشتمل على ما يغضب الله ورسوله

طريقه الطلبات
اكتب تعليق على هذا الموضوع يشتمل على
اسمك
اسمك مدونتك
وصف ملخص للمدونه والمواضيع التى تهتم بها
طريقه مراسلتك لو لك رغبه فى ذلك

بعد ذلك ارتب انا المدونات حسب اولويتها من حيث الطلب واعرضها فى هذا الموضوع برابط مباشر وقريبا انتظرو مفاجاءه عملاقه

ادعمونا

اذا كانت لك الرغبه فى ذلك اضف هذا الكود الى مدونتك حتى يتعرف عليه زوار مدونتك وزوار المدونات الموجوده بالفهرس وبالتالى ستكسب زوار كل من بالفهرس وتضيف الى نفسك زوار جدد بالمئات ممن هم زوار اصدقائك ويتححق هدف الفهرس على اكمل وجه
لا تتردد اجعل هذا الفهرس مصدر زوارك الدائم .. ضع مدونتك على الخريطه للابد.. لن يتطلب هذا مساحه كبيره فى مدونتك.. واعلم تماما ان هذا فى مصلحتك اولا وبدايه لخلق رابط قوى يجمع كل المدونين .. تقبلوا خالص تقديرى وتحياتى