14 نوفمبر ليله ساحره فى الاسكندريه

مصــــــــــــــر V.S الجــزائــــــر

14 نوفمبر

كانت ليله 14 نوفمبر فى مدينه الاسكندريه ليله مختلفه وجميله مليئه بالافراح بعد فوز منتخب مصر على الجزائر فى مباراه مستفزه وصعبه احتجنا الى هدفين فى تسعين دقيقه جاء الهدف الاول فى اول دقيقه والثانى فى اخر دقيقه وباقى المباراه كنا قاعين على اعصابنا شويه ندعى وشويه نتنرفز وشويه تشدنا هجمه ونقف على حيلنا وشويه نقول الحمد لله ..... المهم المباره خلصت وفرحنا واعتقد ان كل الناس كانت محتاجه فرحه زى دى من زمان تخرج فيها طاقتها وتعيش يوم مختلف عن الايام الروتينيه بغض النظر عن سبب الفرحه .
هنا فى الاسكندريه حيث اعمل الان امتلئت الشوارع بالسيارات والناس الذين تركوا منازلهم ليخرجو فى موكب جميل ويعبروا عن فرحتهم فاصبح الكورنيش وكانه قاعه افراح كبيره مسموح فيها بكل اشكال الفرح من العاب ناريه ومبارزه بالسيارات والموتسيكلات حتى انى لقيت واحد بيأمرك بالقمر الصناعى حقه (بتاعه بالمصرى) انا عن نفسى كنت عاقل خالص فى اليوم فعلى سبيل المثال اول مالهدف التانى جه الناس كلها فرحت فى مكانها وعلى كراسيها فى القهوه اللى كنت عليها اما انا فسيبت القهوه وطلعت اجرى فى الشارع ورى العربيات زى مكون كنت بسابق فيها انا فعلا كنت محتاج يوم زى ده افرح فيه كده كنت محتاج تغيير ومباراه زى دى احسن تغيير ليومك لما نفوز وان شاء الله تكمل الفرحه يوم الاربع وساعتها ممكن اجرى على السكه الحديد واسبق القطر يعم الحج ... انا مش مجنون والله بس بحب الكوره ومبحبش حد يكسب مصر المهم انا خرجت فى الموكب اللى كان فى الاسكندريه وصورتلكم شويه فيديوهات ممكن تشوفوها وتشوفو الناس كانت مظقططه قد ايه
بس اليوم فعلا كان كله حلو وكله اخبار حلوه لانى سمعت فيه خبرين تانين حلوين الصبح فيهم واحد يخص مستقبلى وربنا يوفقنا كلنا فى مستقبلنا ويجعل ايامنا كلها افراح .
عايز برضو ان فيه حاجه غريبه انا حلمت ان المباراه دى هتخلص 4 - 1 لمصر ومش عارف ايه اللى حصل النتيجه متحققتش ليه اكيد الحكومه ورى تبويظ الحلم بس لسه فى يوم تانى .

كورنيش الاسكندريه بعد المباراه