مصر زماااااااااان ..قول للزمان يرجع تانى

Posted on الجمعة، سبتمبر 26، 2008 by Dr ayman

EGYPT at the beginning of 20th century

بسم الله الرحمن الرحيم

السلام عليكم ورحمة الله وبركاته


جميعنا يحب مشاهدة الصور القديمة .. وخاصة إذا كانت هذه الصور لأماكن مازالت موجودة حتى الآن وربما زرناها
حرصت ألا تكون الصور لأماكن صماء .. وإنما صور لأشخاص عاشوا قبلنا وسنعرف الكثير عن حياتهم وعاداتهم حتى تكون الصور بها حيوية
ولنركب آلة الزمن الخاصه بزوار
سباح فى بحور الظلام لنتجول بها في سحر الماضي وعبق التاريخ (الصور منقووووله )

وسيلة الإنتقال الفارهة ..
ما ترونه الآن كأنها مرسيدس آخر موديل في وقتنا
فلن يركبوا على ظهر الجمل .. وإنما في حجرة معتدلة .. وتغطيهم من الشمس
أكيد وقتها كان الناس لما تشوف حاجه زى دى معديه عليهم
بسرعه البرق وهما قاعدين على بير مسعود كانو بيتمنو يمتلكوها
كانت هذه هي الطريقة التي تنتقل فيها العروسة إلى بيت زوجها ، ويتم تزيين الجمل كما نزين السيارات هذه الأيام
الحجرة التي على الجمل مزخرفة بشكل جميل ومصنوعة بما يسمى اليوم ( أرابيسك )


إحدى الحارات المصرية القديمة ..
لاحظوا البيوت وعليها المشربيات من الخارج .. وغالبية البيوت في مصر القديمة كان عليها مشربية .. وذلك للحفاظ على خصوصية من في البيت .. ولها أيضاً دور في تكييف الهواء بالداخل



أحد المقاهي القديمة ..
لكنها في حي شعبي قديم .. بعكس مقاهي القاهرة القديمة في الأحياء الراقية التي كانت اجتماع نخبة الأدباء والشعراء
شايفينن الواد بليه


ياسلام....
منظر عام للدقي من إحدى البلكونات

لا عمارات .. ولا زحمة .. ولا سيارات
البيوت وقتها كانت كما ترونها .. عبارة عن فلل بحد أقصى 3 أدوار .. وكانت كل فيلا أمامها بعض الأشجار داخلة في ملكية الفيلا
جزء كبير من هذه الفلل موجود حتى الآن وبالذات في مصر الجديدة والدقي وحلوان ..
حيث كان يقيم فيها اليونانيون الذين أقاموا فترة كبيرة في مصر لقربهم منها


صورة المزارعين وهم يستعدون للمرور من على كوبري قصر النيل
(ايام مكانت مصر مفيهاش غير تلات كبارى )

كان الإنتقال وقتها مقابل قرشين .. وكان يتم إعفاء الأطفال دون الـ 6 سنوات
زى القطر عندنا كده



أفراد الجيش البريطاني أثناء الحر العالمية الثانية وهم ( ملمومين ) على أبو الهول
كان قريباً من الأرض وقتها لأن جزءاً كبيراً من جسمه كان مدفوناً تحت الرمال
لذا كانوا يصعدون على كتفه لأنه قريب منهم لحد موقعو منخيره



جنرالات الحرب العالمية الثانية في لقطة تاريخية أمام الأهرامات
الحرب كانت من 1939 إلى 1945
شايف التناكه.. طبعا كانو اسياد العالم
بس فى واحد بينهم اشك انه انجليزى


صورة قديمة لجامعة القاهرة .. في الجيزة
مشهورة بالقبة والساعة الموجودتين حتى الآن ..
تم إنشاء الجامعة عام 1908 وكان اسمها في أول الأمر : الجامعة المصرية
ثم تغير الإسم إلى جامعة فؤاد الأول
وبعد الثورة تم تسميتها جامعة القاهرة
وجارى تحويلها الان الى محل علف لزوم الفهم ..طبعا العيب مش فينا ..
بلا فخر هذه الجامعه الان تحتل المركز 2000 وشويه على العالم وال 11 على افريقيا وطبعا الاول على مصر
فى حين ان جامعات جنوب افريقيا تحتل ال 11 مركز الاوائل على افريقيا
واسرائيل ضمن اول 1000 على العالم على ما اتذكر وطبعا امريكا اول 50 جامعه على العالم بدون مقاطعه

جمع غفير من المصلين بعد صلاة الجمعة في الجامع الأزهر
كان هذا المسجد ليس مجرد مسجداً للصلاة فقط .. وإنما كان له دوراً سياسياً كبيراً جداً
فمعظم الثورات ضد الإنجليز كانت تقام منه بعد صلاة الجمعة ، وكان نابليون يذهب إلى شيخ الأزهر بدلاً من الحاكم كي يترك أثراً طيباً في نفوس الناس
تأملوا الناس في الصورة السابقة .. منهم من يرتدي بدلة وكأنه يعيش بيننا الآن .. والغالبية تلبس الزي الطبيعي وهو عباية وعلى الرأس طربوش
وتلاحظوا وجوه من أفريقيا في الصورة .. فقد كانت تأتي للدراسة في الأزهر على نفقته .. ومازال الأزهر يقدم هذه الخدمة المجانية لمسلمي أفريقيا وشرق آسيا وأوروبا
هيه .. فين الازهر ايام ما كان ازهر قبل ميخد مقرراته وفتاويه من امريكا


خزان أسوان ..
وهو السد الذي كان موجوداً قبل بناء السد العالي ، ووظيفته أنه يحجز مياه الفيضان للإستفادة منها في الري ، لكنه كان لا يحجزها لأكثر من سنة وبعد كده يطلعها على دماغ الناس
المهندسين الذين بنوا السد كانوا يستريحون في جزيرة بالقرب من أسوان اسمها جزيرة إلفنتين .. وهي الآن مزاراً سياحياً مهماً
الصورة السابقة التقطت عام 1906 بكاميرا موبيل المهندس المنفذ ايام الموبيلات الخشب

مؤذن فوق أحد مآذن مساجد القاهرة القديمة
كل ما في الصورة السابقة مازال موجوداً طبق الأصل .. القلعة من بعيد وبعض المساجد الأخرى .. وما بينهما عبارة عن مقابر المماليك
كان المؤذن يصعد أعلى المئذنة ويؤذن بدون مايكروفونات


صورة كانت تتكرر صباح كل يوم .. ومازالت تتكرر حتى الآن ولكن بطرق مختلفة
حيث يقف أحد البائعين صباحاً وأمامه عربة وبها الفطار ويتجمع حوله العمال لتناول الفطار قبل الذهاب للعمل
واعتقد انا شخصيا انه ببيع فول ( رفيق المواطن المصرى )


بائع ألومينوم داخل أحد حواري مصر القديمة
رغم أن الصورة منذ عام 1905 إلا أن الوجوه مألوفة .. وسبحان الله الإبتسامة عليهم منذ القدم
وواضح طبعاً بأنهم كانوا وقتها في الشتاء
بمناسبه الالومونيه
كنت راكب فى المواصلات قريب واذا بعائله غايه فى الكوميدا تركب.. رجل وامه العجوز واخواته وابنائه.. وملو العربيه عن اخرها
السواق يقود مسرعا .. الام العجوز يصيبها الفزع .. طبعا وسائل النقل ايامها كانت اكثر امان .. تقول للسائق ( براحه يخويه انت هتطير بنا ياك ساروخ اما يلهفك) الابن .. خايفه من ايه يامه منتى قاعده ورى ومش هيجرالك حاجه .. تعالى قعدى قدام علشان لما السواق يضرب فرمله تلزقى فى الازاز ونخلص.. فاصل من الضحك..
البنت لامها فين حله الالومونيه بتاعتى يامه اللى خدتيها .. السائق مستعجبا وكأنه كان بيحمل النمسا ومش من مصر الومونيه ...!!! الام بلهجه الغناء المرح .. اه ياخويه .. الالومونيه حلت ستك ياوله .. عائله قمه الكوميديا والبساطه والمرح .. عائله مصريه لسه على طبيعتها وكأنها لم يأتى عليها غبار الزمن ولم تتأثر بموجات العولمه والحضاره الحديثه .. وطبعا استمرت القفشات و الايفهات المضحكه الى اخر الطريق .. كانت احسن مواصله ركبتها فى حياتى .. وخرجتنى من الجو الوحش اللى كنت فيه

صورة اخري لآفطار العمال في الصباح...





عمليه نقل المياه من النيل للبيوت مباشره حيث لم تكن يد التلوث قد وصلتهم بعد

جزء من الآثار الفرعونية في أسوان وهي غارقة
قبل بناء السد العالي كان كل عام يأتي الفيضان ويهدم القرى ويغرق المنازل ويدمر الأراضي الزراعية ، لذا كان التفكير في بناء السد العالي
والصورة السابقة تم تصويرها أثناء الفيضان بموبيل نفس المهندس


هذه الصورة تعود إلى عام 1922 وذلك عندما تم اكتشاف مقبرة توت عنخ آمون في الأقصر
وهي المقبرة الوحيدة التي وجدوها كاملة المجوهرات وممتلكات الملك
اكتشفها أحد العلماء البريطانيين بتمويل من مليونير بريطاني كان من ضمن القلائل الذين يمتلكون سيارة في بريطانيا
وما تشاهدوه في الصورة هو أحد العمال عندما كان ينقل الآثار من المقبرة لترحيلها إلى المتحف المصري بالقاهرة


روعــــــــــــــه.....
منظر غير موجود ولن تراه أبداً
.. الأهرامات وبجانها نهر النيل

حيث كان أحد فروع النيل يسير بمحاذاة الأهرامات .. وقد نقل الفراعنة الأحجار إلى هذا المكان بواسطة سفينة كانت تسير في هذا الفرع
السفينة موجودة حتى الآن وتعرض في متحف بالقرب من الأهرامات .. اسمها سفينة الشمس
وهي سفينة ضخمة جداً ولا يمكن أن تستوعبها صورة واحدة


اتمنى الصور تعجبكم.. انا لما شوفتها صممت انقلها علشان كلكم تشوفوها

27 Responses to "مصر زماااااااااان ..قول للزمان يرجع تانى":

Hossam says:

سلام عليكم
بجد جامد جامد جامد اخر حاجة
والله يا دكتور كنت بفكر اعمل بوست زى ده بس مقارنة صور زى دى قديمة مع الصور الحديثة بتعتها
لان فعلا صورة زى بتاعت نهر النيل والاهرامات حصلها عملية obliteration
وعمرنا مهنعرف نشوف المنظر ده تانى
بوستك تحفة
وكنت عايز اعلق عن موضوعك مع الصباغ
ان انتوا الصراحة الاتنين غلطانين
وبذات انت لانك شتمت شتايم مش من الائق ان دكتور يقولها واحمد طبعا غلطان وانا هقوله رايى فى مدونته
بس بجد كويس انك مسحت البوست بتاع الشتايم ده لانه كان هيبقى بصمة سودا فى مدونتك لو حد قراة اكتر من كده وبقى بصمة سودا فى مدونتك للى قروة
تقبل مرورى صديقى واتمنى انك مش تزعل من وجهة نظرى
انت دكتور ايمن وهتفضل دكتور ايمن اللى ليك كل احترام
تقبل مرورى
وكنت مبسوط انى اول تعليق
سلام

Rannon says:
أزال المؤلف هذا التعليق.
Rannon says:

بوست حلو قوي وصور قديمة غريبة علينا

وعلى رأيك قول للزمان إرجع يازمان :)

بس ايه حكاية موبايل المهندس دي .. انا قربت أصدق :))

تحياتي :)

دكتور/ ايمن القناوى says:

حسام حبيب قلبى وصديقى اللى عمره مهزعل منه .. طبعا مش زعلان منك يا حسام بس انت فاكر انى انا اللى بدءت بالشتايم ازاى .. انا نزلت البوست بتاعى رد على كلامه فى البوست بتاعه يعنى مش انا اللى بدءت الغلط.. ما علينا ايا كان الكلام ده محبش انه يكون موجود عندى على المدونه لانه اساءه ليه وعلشان مكونش انا السبب ان غير المسلمين يضحكو علينا .. هو ده اللى خلانى امسح البوست وطبعا مش هيفرق خالص رد فعل الطرف الاخر .. لانى عملت كده فعلا علشان محدش يشمت فى المسلمين بسببى
نورتنى يا حسام وسيبك انت زيارتك بالدنيا

دكتور/ ايمن القناوى says:

Rannon نورتينى بزيارتك
موبيل المهندس ده من اقدم الموبيلات اللى وجدت فى العالم ايام ما كان الموبيل خشب وله سلك ونمره المويل رقمين بس وكانت نمره المهندس بتاعنا ده زيرو خشبه

غير معرف says:

بجد حلوة اوى اوى الصور دى
انت جبتها منين
عموما انا صورت مركب الشمس بصورة واحدة بس م عارفة ابعتهالك ازاى
والحمدلله ان مودك اتحسن بالاسرة المصرية الاصيلة
نيرة احمد محمود

دكتور/ ايمن القناوى says:

يا نيره ليه عظيم الشرف انك تكونى متابعانى بجد انت اخت محترمه وفكرك محترم
الايميل بتاعى موجود فى البروفيل ياريت تضيفنى اتشرف بصداقتك وعشلان اخد الصوره اللى عندك واعرضها
تقبلى خالص تحياتى المرصعه بالامتنان والاحترام والتبجيل لشخصك المسلم

مصري بالغربة says:

صور تحفة فعلا

والاجمل تعليقك عليها بردوا

لك تحياتي

Dr.Mohammed Gohary says:

كالعادة
موضوع رائع يا كين
إيه لسه برضو مش هترد عليااااااا؟؟
إخصٌ عليك وألف إخصٌ وبينهما إخصين متشابهين
قصيدة إخص للمتنبي
داحنا عشرة عمر يا كين عيب عليك


عجبتني جدا صورة الأهرام والنيل

تحياااااااتي

Dr.Mohammed Gohary says:

مزعلني وجي أصالحك ما شوفتش لزقة أكتر من كده؟؟؟؟؟
ههههههههههههههههههههه
دعك من هذا الفشر
أسيبك أناااااااا
ربنا معاك يا بوص

MISS\GH says:

دكتور ايمن بجد موضوع جديد وجميل انك حاولت تلخص حكايه مصر فى كام سطر والصور رائعهبتمثل نماذج كتير من طبقات الشعب المصرى القديم ....بحييك على الموضوع ده.
miss\gh

MISS\GH says:
أزال المؤلف هذا التعليق.
دكتور/ ايمن القناوى says:

مصرى بالغربه
تعليقك زادنى شرفنا كما اسعدتنى زيارتكم
اتمنى متكونش الاخيره .. وربنا يكرمك ويعينك على الغربه ويعين كل الشباب المصرى اللى اتكتب عليه الغربه كله فى بدايخ حياته

دكتور/ ايمن القناوى says:

يا جوهرى ربنا ميجيب زعل والعشره لها حق كبير زى مقلت
وانت عارف انا بقول ايه فى المواقف اللى زى دى دايما
دعـــك مـــن هــــذا الفشـــر

دكتور/ ايمن القناوى says:

MISS\GH شكرا ليك ومنوره المدونه كالعاده .. كل بوست ليه لازم يكون ليك فيه تعليق .. يارب دايما عند حسن الظن
ومبروك المدونه الجديده

FreeKiller says:

هههههههههههههههه
حلو قوي الواد بلية
مبتسم و منشكح

بالنسبة للشجر
ما خلاص بقى
قانون الضرايب العقارية قضى عليه

نلاحظ كمان ان كوبري قصر النيل من غير الاسدين
طب كانوا بيعرفوا انه كوبري قصر النيل ازاي بس؟؟

امممممممممم
يعني مش نابليون اللي وقع مناخيره!!!!!!!!!

ما بلاش تجيب سيرة قبه جامعه القاهرة
لا تتحرق هيا كمان ضمن سلسلة حريق القبب اللي ماشية ف البلد
مجلس الشعب و الشورى
و بعدين المسرح القومي

بس الحمد لله
ربنا كتبهالي و دخلت تحت القبه دي الاسبوع اللي فات ف حفل اللاتكريم اللي كان مع وزير التعليم العالي
عشان اما تتحرق
ابقى شفت حاجه احكيهل لولادي

بالنسبة لترتيب الجامعات
منستقلش طبعا بجنوب افريقيا
بما انها الدولة الاغنى و الاكثر تقدما من الناحيه الصناعيه ف افريقيا كلها
عموما هي الزقازيق بتاعتنا
مركزها الكام بقى ان شاء الله


و ممكن كيلو علف لو سمحت!!!!!!!!

اخر صورة دي اللي روعه بجد

تسلم ايك
موضوع رااااائع
و كل سنة و انت طيب
و معذرة عالتطويل ف التعليق

ضد الظلم says:

مش هيرجع يستحقه الى عاشوه اما احنا منستحقوش احنا
صور اكثر من رائعه وعندى المجموعه دى
تحياتى
وكل عام وانت بخير
عيد سعيد
تحياتى
ابوالعربى

FreeKiller says:

المدون الزميل المحترم
بعد التحية
ندعوكم لحضور ملتقى مدوني الشرقية الأول
يوم الأحد 5-10 الساعة الرابعة مساءً
بمقر النادي الإجتماعي بالزقازيق بشارع مدير الأمن أمام حزب الوفد
وللمزيد من التفاصيل يرجي زيارة اللينك التاااااالي
http://goharyblog.blogspot.com/

و كل عام و انتم بخير

Hossam says:

ايه ده
فين الجديد مش متعود عليك تقعد كتير من غير متتحفنا بكلامك
عيد سعيد صديقى

MISS\GH says:
أزال المؤلف هذا التعليق.
قلب شاعره says:

مشكور على تعبك بجد فى مدونتك الجميله جداا .. فعلا قول للزمان ارجع يازمان كان حال ودلوقت حال غير الحال ...
مدونتك بجد رائعه جداا واعجبتنى ..
كمان جميل منك انك تتمنى تكون مثل هؤلاء الى انت زكرتهم ..

غير معرف says:

مفيش غير أنى اقول مصر هى أمى نيلها جوه دمى وأهلا بيك يا مصرى
صور جامده مووووووووت:)
منة الله

sara says:

تحفه جدا،الصور راااااااااائعه، والتعليقات حلوه جدا

شــــمـس الديـن says:

ماشاء الله الصور فعلا جامدة جدا و خاصة النيل اللي جنب الاهرام

انا اعرف ان منطقة فيصل كانت لحد وقت قريب كانت زراعات و شارع العشرين نفسه كان ترعة كبيرة

فيه مناطق ظلت مثلما هي زي جزء من القاهرة الفاطكمة و فيه مناطق اتنسفت بالكامل

يعني التحول السريع للقاهرة
مشكور علي النقل الجميل

hager za3bal says:

بجد صور تحفه
عجبتني اوي صورة النيل والاهرامات
والاجمل تعليقك عليها

بس انت ليه بتتأخر في البوستات
يارب تكون بخير

في انتظار جديدك

تحياتي

FreeKiller says:

كل سنة و انت طيب يا دوك
عيد سعيد

Brave Heart says:

أرجوكم ، أستحلفكم بالله

أستحلفكم بما بقى فى نفوسنا من عزة وكرامة وكبرياء عربية

كفانا ذلا وهوانا

قاطعوا منتجات اليهود

كفانا قتلا فى ابرياء فلسطين

التبرعات ما أكثرها بالبلايين يوميا لاسرائيل حتى تنتصر عليهم

ومن الظالم ومن المظلوم

ذهب العدل والشرف ودفننا الكرامة بأيدينا

الم يأن للعرب ان يتحدوا

كفانا هوانا وذلا وضعفا

ملحوظة:

سيأتى اليوم الذى يسألنا فيه اولادنا

ماذا فعلتم لفلسطين ؟

ولا اعلم بما سأرد على ابنائى

وسيسألنا الله يوم القيامة

ماذا فعلتم لتوقفوا الزل والظلم والهوان

ماذا فعلتم ؟

أأنت متحرك أم انك ستظل تقرأ فى رسائل الدعوة للمقاطعة وتعود وتساند اسرائيل بشرائك منجاتها

انت على القدر الكافى من العقلانية فى اتخاذ قراراتك

فلتحدد سريعا

هل تبقت داخلك دماء الكرامة والحياء والشرف

أم انها تلاشت كما تلاشى كل ما هو صحيح فى حياتنا



انا عربى